Umukandida w’ihuriro ry’amashyaka rya Azimio La Umoja, Martha Karua wari wagenwe na Raila Odinga nk’uzamubera visi Perezida, yaragagaje ko atemera ibyavuye mu matora yegukanywe na William Ruto nk’ umukuru w’igihugu ugiye gusimbura Uhuru Kenyatta.
Ku wa Mbere tariki 15 Kanama 2022, nibwo byatangajwe ko William Ruto wari umaze imyaka 10 ari Visi Perezida wa Kenya ari we watorewe kuyobora iki gihugu ku majwi 50,49%, atsinze Raila Odinga bari bahanganye , cyane ugereranyije n’abandi bakandida-Perezida babiri.
Nyuma gato y’itangazwa ry’ibyavuye mu matora yabaye ku wa 9 Kanama, Karua yagize ati “Ntibirangiye.”
Abayobozi bo mu ihuriro rya Azimio La Umoja bavuze ko haba harabaye uburiganya mu migendekere y’amatora nk’uko Citizen Digital ibivuga.
Mbere y’uko Perezida wa Komisiyo y’Amatora, Wafula Chebukati atangaza amajwi, uwari uhagarariye Raila Odinga, Perezida w’Ihuriro ry’amashyaka rya Azimio La Umoja, Saitabao Ole Kanchuri, yavuze ko ikoranabuhanga ryakoreshejwe mu kubarura amajwi ryinjiriwe, ariko ubuyobozi bwa komisiyo y’amatora muri iki gihugu buvuga ko bitigeze bibaho.
Ubusabe bwo kutemera ibyavuye mu matora bugomba kuba bwatanzwe mu minsi irindwi uhereye igihe komisiyo y’amatora yatangarije amajwi. Ni ukuvuga ko igihe ntarengwa ari ku italiki ya 22 z’uku kwezi, naho Urukiko rw’Ikirenga rugena ko ubusabe bwigwaho bitarenze iminsi 14 uhereye ku munsi bwakiriweho.
Mugihe ibi bitakorwa, William Ruto yarahira ku itariki 30 Kanama 2022. Ubu akaba yatangiye guhabwa amakuru ajyanye n’inzego z’umutekano w’igihugu nka perezida mushya watowe.
