Abatavuga rumwe n’ubutegetsi muri Kenya biteguye gukomeza imyigaragambyo none kuwa mbere nubwo polisi yaburiye ko iza gukaza ingamba kucyo babona ko ari imyigaragambyo itemewe.
Iyi myigaragambyo yatangiye mu cyumweru gishize iza kuvamo urugomo mu bice bitandukanye byiganjemo abashyigikiye Raila Odinga.
Odinga wayihamagaje, avuga ko izajya iba kuwa mbere no kuwa kane mu kwamagana kuzamuka kw’igiciro cy’imibereho no kwamagana perezida William Ruto kuko avuga ko atatsinze amatora.
Gusa umukuru w’igipolisi cya Kenya, Japhet Koome, ku cyumweru yavuze ko “nta myigaragambyo n’imwe nemeje” kandi aburira ko benshi bazafungwa.
Itegeko rya Kenya ntabwo riteganya ko umuntu asaba uburenganzira kugira ngo yigaragambye, asabwa gusa kubimenyesha.
Koome yabwiye abanyamakuru ati: “Twakomeje kwifata no kugenda buhoro. Ibyo ntabwo twakongera kubikora. Tugomba kuza nka polisi tukubahiriza itegeko maze ituze rigakomeza. Ubwo ni ubutumwa kuri buri wese.”
Ku cyumweru Raila Odinga we yashimangiye ko imyigaragambyo irengerwa n’itegeko.
Yagize ati: “Twamenyesheje polisi imyigaragambyo nk’uko biteganywa n’itegeko. Ntabwo dushaka igitugu mu gihugu cyacu, kandi turarwanira uburenganzira bwacu. Abaturage ba Kenya bafite uburenganzira bwo kwigaragambya mu mahoro.”
Gusa imyigaragambyo nk’iyi yabaye mbere ntiyabaye mu mahoro n’ituze, yakunze kurangwa n’ibikorwa by’urugomo n’ubusahuzi.
Mu mujyi wa Nairobi, ibikorwa byinshi kuri uyu wa mbere mu gitondo biragenda biguru ntege, benshi birinze gufungura ubucuruzi bwabo bategereje kureba uko bigenda.
