Kuri uyu wa Kabiri haramutse ibikorwa byo gusahura inyubako za MONUSCO mu mujyi wa Goma, nyuma y’imyigaragambyo yo kuwa mbere nayo yabayemo ubusahuzi no gutwika.
Imyigaragambyo ikomeye yageze mu ijoro ryo kuwa mbere tariki 25 Nyakanga 2022, yabayemo gusahura no gutwika zimwe mu nyubako za MONUSCO i Goma.
Mu gitondo cy’uyu munsi kuwa kabiri abaturage bigabije kimwe mu bigo bya MONUSCO i Goma basahura ibikoresho byacyo, nk’uko ibinyamakuru byaho bibivuga.
Amakuru avuga ko kuwa mbere hari abasivile barashwe bagakomereka ndetse ko hari n’abapfuye mu gihe abapolisi ba MONUSCO bageragezaga guhagarika abateye inyubako zayo.
Kuwa kabiri, Khady Lo Ndeye umuvugizi wa MONUSCO yabwiye BBC dukesha iyi nkuru, ko batari mu gihe cyiza cyo kugira icyo bavuga kuri ibi.
Inzego zibishinzwe ntiziremeza ayo makuru, gusa amwe mu mashusho agaragaza umuntu abigaragambya bavuga ko yapfuye arashwe n’aba MONUSCO.
Hari ubwoba ko iyi myigaragambyo n’ubusahuzi bishobora gukomera kuri uyu wa kabiri.
Abigaragambya bavuga ko bashaka ko izi ngabo za ONU ziva mu gihugu cyabo, ariko barimo kurangwa n’ibikorwa byo gusahura.
Itangazo rya MONUSCO ryo mu ijoro ryo kuwa mbere rivuga ko yamagana ishimitse, abo yise itsinda ry’abasahuzi bikinze mu myigaragambyo, yari yabujijwe n’umukuru wa Goma.
Andi mashusho yashyizwe ku mbuga nkoranyambaga yerekana uwigaragambya abaza umupolisi wa MONUSCO igihe bazasubirira iwabo.
Uyu amusubiza ko ari “vuba”, undi akamubwira ko ngo barambiwe kuko bahora bababwira gutyo.
Mu itangazo ryayo kandi, MONUSCO yibutsa ko ifatanya na leta kurwanya imitwe yitwaje intwaro, gusubizaho ubutegetsi, no kurinda abasivile.
Abigaragambya bo banenga MONUSCO kuba mu myaka irenga 20 imaze mu burasirazuba bwa DR Congo nta musaruro itanga kuko aka gace gakomeje kuba isibaniro.
Khassim Diagne, umukuru wa MONUSCO w’inzibacyuho, mu itangazo ryamagana ibyabaye ejo kuwa mbere yagize ati:“Mu mvururu no mu rujijo cyangwa gucanamo ntabwo ariho tuzagera ku gahenge n’amahoro.”
