Umuyobozi w’Ishyaka Chadema, ritavuga rumwe n’ubutegetsi muri Tanzania, arahamagarira Abanyapolitike bahungiye mu mahanga kugaruka mu gihugu.
Ni mu gihe reta y’icyo gihugu iherutse guhamagarira Abanyapolitike bahunze ku gihe cy’uwahoze ari perezida nyakwigendera John Magufuli kugaruka, babizeza ku mutekano wabo uzaba usesuye.
Mu ntangiriro z’iki cyumweru, Minisitiri w’Umutekano muri Tanzania yasabye Abanyapolitike bahunze gutahuka nyuma y’ibiganiro bitari bike byabaye hagati ya Leta n’amashyaka ya politike.
Ku wa kane umunyamabanga mukuru wa Chadema John Mnyika, yijeje abayoboke b’iri shyaka bose bahunze ko perezida Samia Suluhu yiyemeje kwubahiriza umutekano wabo.
Bamwe mu banyapolitike bazwi cyane bahunze barimo uwigeze guhatanira kuyobora iki gihugu Tundu Lissu hamwe n’abahoze muri Guverinoma Godbless Lema na Ezekiel Wenje.
Nyuma y’amatora yo mu 2020, Lissu yahise asaba ubuhungiro bw’igihe gito mu rugo rwa Ambasaderi w’Ubudage i Dar es Salaam, avuga ko yari afite ubwoba bwo kwicwa n’ubutegetsi bwa perezida Magufuli.
Yaherukaga kugaruka mu gihugu avuye mu buhungiro muri uwo mwaka mwaka, ubwo yari aje guhatana mu matora y’umukuru w’igihugu yatsinzwe na Magufuli.
Tundu Lissu aba mu mahanga kuva agerageje kwicwa arashwe amasasu 16 ariko akarusimba mu 2017 mu gikorwa benshi bavuga ko cyari ku mpamvu za politike.
Mu Ukuboza 2020, uwahoze ari umudepite Godbless Jonathan Lema yahungiye muri Canada n’umuryango we amaze kwemererwa ubuhungiro bwa politike.
Prezida Samia Suluhu Hassan yagiye ku butegetsi nyuma y’urupfu rw’uwari perezida muri Werurwe umwaka ushize wa 2021.
