Mu gihe kuri uyu wa Gatatu byari biteganijwe ko mu Rukiko rw’Ibanze rwa Nyarugenge, Hakuzimana Abdul Rashid yari kuburana ku ifungwa n’ifungurwa ry’agateganyo ku byaha akekwaho byo Guhakana no Gupfobya Jenoside yakorewe Abatutsi mu 1994, urubanza rwe rwasubitswe kuko umunyamategeko wunganira uregwa atabonetse mu rukiko.
Hakuzimana Rashid yatawe muri yombi ku wa 28 Ukwakira, 2021 akurikiranyweho ibyaha byo Guhakana no Gupfobya Jenoside yakorewe Abatutsi mu 1994, n’icyaha cyo Gukurura amacakubiri mu Banyarwanda.
Rashid ibyaha aregwa bifitanye isano n’ibiganiro yakoze bigatambuka ku miyoboro ya YouTube itandukanye, aho yakunze kwiyita “umunyapolitike utavuga rumwe na Leta” akavuga ko yemerewe gutanga ibitekerezo yita ibye bwite. Agifatwa yafungiwe kuri Station ya Police ya Kicukiro.
Kuri uyu wa Gatatu tariki 10 Ugushyingo 2021, yagaragaye mu rukiko yambaye kamambiri z’uburu, ipantaro ya koto ya kake n’ishati y’ubururu, Hakuzimana Abdul Rashid yari ku Rukiko rw’Ibanze rwa Nyarugenge.
Umucamanza yabajije Abdoul Hakuzima Rashid niba yiteguye kuburana avuga ko atiteguye kubera ko umwunganira mu mategeko, Me Rudakemwa Felix adahari kandi ko atanazi impamvu ataje kumwunganira.
Yagize ati: “Nyakubahwa Perezida mu nyungu z’ubutabera ndasaba ko nasubikirwa iburanisha rya none, Umunyamategeko wange Me Rudakemwa akabanza akaboneka.”
Ubushinjacyaha bwari buhagarariwe n’Abashinjacyaha babiri, umucamanza yabuhaye umwanya ngo bugire icyo buvuga ku byari bimaze kuvugwa na Hakuzimana Abdul Rashid.
Ubushinjacyaha bwabwiye Urukiko ko butunguwe no kubona Umunyamategeko Me Rudakemwa Felix atagaragaye mu Rukiko kandi yari azi neza ko umukiliya we ari buburane none.
Ubushinjacyaha bwasabye Urukiko ko mbere yo gufata icyemezo ku cyifuzo cya Hakuzima Abdul Rashid rwareka Ubushijacyaha bukabanza guhamagara kuri telephone Me Rudakemwa Felix bakumva niba ari mu nzira aza ku rukiko kunganira umukiliya we.
Urukiko rwahaye uwo mwanya Ubushinjacyaha buhamagara Me Rudakemwa Felix telephone igacamo ariko ntayitabe.
Ubushinjacyaha bwasabye urukiko ko Umwanditsi w’Urukiko na we amuhamagara ko wenda yakwitaba, na we aragerageza ahamagara Me Rudakemwa Felix nabwo ntiyitaba.
Urukiko rwahise rufata icyemezo rusubika iburanisha, Umucamanza avuga ko urubanza rusubitswe mu nyungu z’ubutanera kuko kuburana umuntu yunganiwe biri mu burenganzira bwe yemererwa n’amategeko.
Umucananza yahise asubika iburanisha aryimurira ku wa 17 Ugushingo, 2021 saa mbiri za mu gitondo.
Yavuze ko harebwa uburyo Me Rudakemwa amenyeshwa kugira ngo ubutaha noneho ntazongere kubura mu rubanza.
