Umukino w’umunsi wa kabiri wo gushaka itike yo kwerekeza muri CAN 2023 wagombaga kubera kuri Stade ya Huye, wimuriwe muri Senegal nyuma y’ubwumvikane bw’impande zombi nk’uko bitangazwa na FERWAFA.
Mu itangazo ryashyizwe ahagaragara n’ishyirahamwe ry’umupira w’amaguru mu Rwanda(FERWAFA) Nyuma y’ubwumvikane bw’impande zombi ari zo ishyirahamwe ry’umupira w’amaguru mu Rwanda ndetse na Federasiyo y’umupira w’amaguru muri Senegal, umukino w’umunsi wa kabiri mu gushaka itike yo kwerekeza mu gikombe cya Afurika ntukibereye mu Rwanda kuri Stade ya Huye.
FERWAFA yavuze ko impande zombi zemeranyijwe ko Senegal izakira Amavubi mu mukino ubanza ukazabera i Dakar muri Senegal, mu gihe umukino wo kwishyura wari kuzakirwa na Senegal ukaba ari wo ubera mu Rwanda tariki ya 28/3/2023 .
Ibi bisobanyuye ko ikipe y’igihugu ya Senegal yazakinira mu rugo imikino itatu ibanza yose yo gushaka itike ya CAN, n’aho AMAVUBI nayo akazakinira imikino ibanza hanze y’u Rwanda, iyo kwishyura yose y’u Rwanda ikabera mu Rwanda.
