Minisitiri w’ubuzima wa Uganda yemeje urupfu rw’undi mukozi wo mu rwego rw’ubuvuzi, umuganga utera ikinya, wapfuye kuwa gatatu azize Ebola.
Uyu mugore w’imyaka 58 ni uwa kane ukora mu buvuzi wishwe na Ebola, nk’uko minisitiri Dr Jane Ruth Aceng yabitangaje kuri Twitter.
Ikipe y’abaganga yitaye ku muntu wa mbere wabonyweho Ebola wari ukeneye kubagwa nayo yanduye iyi virus, ishyirwa mu bitaro by’i Fort Portal.
Umunyeshuri wiga ubuvuzi wo muri Tanzania, yari umwe muri iryo tsinda, yapfuye muri weekend ishize.
Abandi bakozi bo mu buvuzi babiri, umwe wo mu karere ka Kagadi n’undi wo mu karere ka Mubende nabo bishwe na Ebola.
Abakozi bo mu buvuzi batangaje impungenge zabo ku kuba badafite ibikoresho by’ibanze byo kwirinda mu minsi ya mbere y’iki cyorezo.
Imibare ya leta ivuga ko abantu 43 aribo babonyweho Ebola kuva yaboneka mu byumweru bibiri bishize muri Uganda, kandi 10 muri bo bamaze gupfa.
Abakozi mu buvuzi bavuga ko bakurikiranye abantu 800 bakekwaho kuba barabonanye n’abantu basanzemo Covid.
