Ishyirahamwe rishinzwe impunzi HCR riremera ko hakiri ibibazo kugirango Abarundi bahawe ubwenegihugu bwa Tanzania nyuma yo kuba impunzi muri icyo gihugu babeho koko nk’abenegihugu buzuye.
Muri abo barundi bagera ku 162.156 hari abamaze imyaka irenga 14 barahawe ubwenegihugu bwa Tanzania. Ariko bavuga ko kugera n’uyu munsi benshi bakibayeho nk’impunzi mu nkambi za Ulyankuru, Katumba na Mishamo.
Babibwiye BBC dukesha iyi nkuru mu kwezi kwa kane uyu mwaka igihe bizihizaga imyaka 50 yari ishize babayeho mu mahoro kuva bahunze mu 1972.
Mu gisubizo kigufi yanditse Umuyobozi wungirije w’uhagarariye HCR muri Tanzania, George Kuchio, yahaye BBC Gahuzamiryango – yari yifuje kumenya icyo iryo shami rya ONU ribivugaho kuva icyo gihe – avuga ati:
“Haracyari ibibazo bituma hataboneka inyungu zose zijanye n’uguhabwa ubwenegihugu, nko ku bana bavutse igihe ama dosiye yari akirimo arigwa cyangwa abasabye icyemezo cyambere cyo kwimwa ubwenegihugu”.
Kuchio akomeza avuga ko HRC idahwema kuganira n’abayobozi ba Tanzania kuri icyo kibazo kandi ko kiri mu bibazo bashyize imbere kugirango kibonerwe igisubizo.
Abo barundi bahoze ari impunzi bavuga ko batigeze bahabwa uburyo bari baremerewe bwo kugura amasambu kugirango bubake amazu bongere bihangire imirimo ya buri munsi nk’abandi banye-Tanzania.
HCR ivuga ko mu minsi yashize yasobanuye uko abo bantu bava mu nkambi babamo kugirango bajye kubana n’abandi banyagihugu ariko ko icyo kibazo kikirimo kwigwaho n’abayobozi ba Tanzania.
Abarundi barenga 160.000 bahawe ubwenegihugu muri Tanzania bari mu bari barahungiye muri icyo gihugu mu 1972. Ariko n’ubu icyo gihugu kiracyacumbikiye impunzi z’Abarundi bahunze mu bihe bitandukanye mu gihe Uburundi bwabaga buri mu makimbirane ya politike n’amoko.
Ubu muri Tanzania habarurwa Abarundi b’impunzi barenga 127.000 hakurikijwe imibare ya HCR. Ushyizeho abari mu bihugu by’abaturanyi bya Repubulika Iharanira Demokarasi ya Congo, Urwanda na Uganda, Abarundi b’impunzi barenga 258.000.
Ahandi hari Abarundi b’impunzi nk’uko byerekanwa na HCR:
* Kenya:16.000
* Mozambique: 8.700
* Malawi: 10.800
* Africa y’Epfo: 9.900
* Zambia: 8.100
Muri Tanzania hariyo kandi Abarundi barenga 42.000 b’impunzi ariko batagihabwa imfashanyo na HCR.
Abo bahoze ari impuzi z’Abarundi ubu babaye abenegihugu ba Tanzania bavuga ko HCR yari yarabemereye imfashanyo yo gutangira ubuzima bushya ariko ko kugeza magingo aya ntayo barahabwa.
Umuyobozi wungirije w’uhagarariye HCR muri Tanzania, George Kuchio, avuga ko: “Hagize ubundi buryo buboneka, buvuye mu basanzwe bafasha, nta mpungenge buzaza gufasha abo bantu kuzamura urugero rwo kubaho neza.”
