kuri uyu wa mbere tariki ya 16 Gicurasi 2022, Urukiko rw’Ibanze rwa Kicukiro rwasomye umwanzuro w’urubanza rwa Ishimwe Dieudonné (Prince Kid) mu ruhame, mu gihe yaburanaga ku ifungwa n’ifungurwa ry’agateganyo urubanza rwe rwabereye mu muhezo mu cyumweru gishize.
Umucamanza mu rukiko rw’ibanze rwa Kagarama, yavuze ko Ishimwe Dieudonné azakurikiranwa ku byaha byo:
- Gusaba cyangwa gukora ishimishamubiri rishingiye ku gitsina
- Guhoza undi ku nkeke bifitanye isano n’imibonano mpuzabitsina
Mu gihe Ikindi cyaha muri bitatu yari akurikiranweho cyo: gukoresha undi imibonano mpuzabitsina ku gahato yagihanaguweho .
Umucamanza yavuze ko icyaha cyo gukoresha umwe mu bitabiriye Miss Rwanda imibonano mpuzabitsina ku gahato yari yarezwe nta bimenyetso bifatika byatuma agikurikiranwaho. Yavuze ko ubuhamya bw’umutangabuhamya w’ubushinjacyaha (umwe mu bitabiriya Miss Rwanda 2020) butagize ibimenyetso bihagije byashingirwaho ngo Ishimwe akurikiranwe kuri icyo cyaha.
Gusa yavuze ko hari ibimenyetso bifatika (birimo amajwi n’ubutumwa) by’uwabaye Miss Rwanda bigize impamvu zo kumukurikirana kuri biriya byaha bibiri.
Ishimwe waburanye mu muhezo , ahakana ibyaha byose ashinjwa, akimara kumva umwanzuro w’urukiko, yahise atangaza ko ajuriye. Ubujujire bwe ariko nti bukuraho icyemezo cy’urukiko cy’uko agomba gukurikiranwa afunze iminsi 30 y’agateganyo mu gihe hageterejwe ko iburanisha mu mizi ritangira.
