Umunya Dominica Patricia Baroness Scotland, yongeye gutorerwa kuba Umunyamabanga Mukuru wa Commonwealth muri manda ya kabiri.
Inama y’Abakuru b’Ibihugu na za Guverinoma bagize Commonwealth yateranye kuri uyu wa Gatanu yatoreye Patricia Scotland indi manda nk’Umunyamabanga Mukuru wa Commonwealth. Mu bahabwaga amahirwe Patricia yarimo ndetse hakabamo na Minisitiri w’Ububanyi n’Amahanga wa Jamaica Madamu Kamina J Smith.
Mu 2016 nibwo Patricia Scotland yatorewe kuba Umunyamabanga Mukuru wa Commonwealth muri manda yagombaga kumara imyaka 4 ariko bitewe n’icyorezo cya COVID -19 byatumye aguma kuri uyu mwanya.
Mu butumwa Madamu Kamina Smith wanahabwa amahirwe yashyize kuri twitter, yavuze ko kuba atariwe watowe ari uko Imana itashakaga ko asiga Jamaica ndetse anishimira mugenzi we Patricia watowe.
Ati “Ndashima ibihugu byose n’abantu bose banshyigikiye muri uru rugendo. Nk’uko nabibwiye benshi muri mwe, niba ibi ntabikoze, Imana ntabwo yari yiteguye ko mva muri Jamaica. Ndabakunda cyane. Nzakomeza gukora kandi ndashimira byimazeyo Baroness Scotland.”
