Raporo nshya y’umuryango w’abibumbye ishami ryita ku buzima (OMS) ivuga ko imfu zose zo mu mwaka ushize wa 2021 izifitanye isano na Covid-19 zikubye hafi inshuro eshatu.
Kuri uyu wa Kane umuryango w’abibumbye wavuze ko hapfuye miliyoni 14.9 zirenga zifitanye isano na Covid-19 mu mpera za 2021. Umubare w’impfu zatewe na Covid-19 kandi ukamenyeshwa OMS muri kiriya gihe, kuva muri Mutarama 2020 kugeza mu mpera za Ukuboza 2021, urenga gato miliyoni 5.4.
Imibare ya OMS yerekana ko abantu bapfuye bazize Covid-19 kimwe n’abapfuye biturutse ku buryo butaziguye bwa yo, harimo n’abantu batabashaga kwivuza mu bihe bidasanzwe by’icyo cyorezo, yazamutse kandi ko imibare y’abapfuye bazize urupfu rutunguranye nk’impanuka zo mu mihanda yagabanyutse kuko abantu bari muri guma mu rugo.
Ariko iyo mibare na yo irahabanye cyane kubera ko hari imibare y’abitabye Imana itaramenyeshejwe OMS mu bihugu bitandukanye bitatanze raporo ihamye.
OMS yavuze ko na mbere y’icyorezo, abantu bari hagati ya 6 na 10 bapfuye ku isi batigeze bandikwa.
Raporo ya OMS yavuze ko hafi kimwe cya kabiri cy’abantu bapfuye kugeza ubu batigeze babarwa bari mu Buhinde. Raporo yerekana ko abantu miliyoni 4.7 bapfiriyeyo bazize icyorezo cya Covid-19, cyane cyane mu gihe kiri hagati ya Gicurasi na Kamena 2021.
Guverinoma y’Ubuhinde ariko ivuga ko imibare y’abapfuye mu gihe cya Mutarama 2020 kugera mu Ukuboza 2021 iri hasi cyane: hafi 480.000.
OMS yavuze ko itarasuzuma neza amakuru mashya yatanzwe muri iki cyumweru n’Ubuhinde, bwasubiye inyuma ku mibare ya OMS kandi butanga imibare y’imfu ku mpamvu zose zitera urupfu muri 2020 ku wa kabiri.
Itsinda ry’umuryango w’abibumbye ishami ryita ku buzima, rigizwe n’impuguke mpuzamahanga zimaze iminsi zikora kuri ayo makuru, zakoresheje guhuza amakuru atangwa n’gihugu ndetse n’ayo mu baturage ,hamwe n’imiterere y’ibarurishamibare, kugira ngo bagereranye aho ayo makuru atuzuye.
Icyakora, andi masuzuma yigenga yashyize ahagaragara ko umubare w’abapfa mu Buhinde urenze kure umubare wa guverinoma, hariho na raporo yasohotse mu bumenyi (Science) ivuga ko abantu miliyoni eshatu bashobora kuba barazize Covid-19 muri iki gihugu.
