Ikigo cya Nijeriya gishinzwe kurwanya indwara (NCDC) cyatangaje ko abantu 21 banduye monkeypox kuva mu ntangiriro za 2022, hapfa umuntu umwe.
Monkeypox, imaze iminsi igaragara mu Burayi no muri Amerika ya Ruguru, ni indwara ubusanzwe ikira ubwayo.
Nk’uko inzobere mu ndwara zandura, Dr Bertha Serwaa Ayi ibivuga, hari ubwoko bubiri bwa virusi: ubwoko bwa Afurika y’Iburengerazuba aho mu banduye 1% kugeza kuri 3,6% bapfa, ndetse n’iyo mu kibaya cya Congo (CB) variant, aho abarwayi 10% banduye bashobora guhitanwa nayo.
NCDC ivuga ko abantu 21 bemejwe mu bantu 61 bakekwaho kuba barwaye monkeypox, muri bo hakaba hapfuye umugabo w’imyaka 40. Ubu bwandu bwavuzwe mu ntara icyenda n’umurwa mukuru wa Abuja.
NCDC ivuga ko muri Nijeriya, igihugu gituwe cyane muri Afurika, ibyago byo kwandura monkeypox ari byinshi ariko ingaruka z’ubuzima zikaba nke.
Ibimenyetso bya yo ni umuriro mwinshi, kubabara umutwe, no kubabara imitsi, kugira ibiheri , kugira uburyaryate ku mubiri bikurikirwa no gushishuka kw’intoki n’ibirenge.
