Urukiko rwakatiye Aung San Suu Kyi , igifungo cy’imyaka ine.
Aung San Suu Kyi, Aregwa ibyaha bitandukanye, birimo kumena amabanga y’igihugu, ruswa, no kwiba amajwi mu matora yo mu kwezi k’ Ugushyingo 2020, aho Ishyaka rye, Ligue Nationale pour la Demorcratie, ryari ryatsinze ayo matora k’ubwiganze amajwi ari hejuru biba intandaro yo kumukorera kudeta.
Uyu munsi, urukiko rwamuhamije icyaha cyo gushishikariza rubanda kwigomeka ku butegetsi bwa gisirikare, rumukatira gufungwa imyaka ibiri, n’icyo kurenga ku mategeko yo gukumira ikwirakwira ry’icyorezo cya virusi ya Corona, rumukatira igifungo cy’imyaka ibiri kuri icyo cyaha. Yose hamwe rero iba imyaka ine.
Abayoboke be bavuga ko ari imanza za politiki, zigamije kumubuza kongera kwiyamamariza kuyobora igihugu.
Minisitiri w’ububanyi n’amahanga w’Ubwongereza, Liz Truss, avuga ko Aung San Suu Kyi na bagenzi be bafungiye akarengane. Arasaba abasirikare bategeka Myanmar kurekura infungwa za politiki, no gusubizaho inzira ya demokarasi.
Josep Borrell, umuyobozi w’urwego rw’ububanyi n’amahanga rw’Umuryango w’Ubumwe bw’Ubulayi, nawe arasaba ko infungwa za politiki n’abandi bose bafungiwe ubusa nyuma ya kudeta bafungurwa vuba kandi nta yandi mananiza.
Mbere y’uko Myanmar itangira inzira ya demokarasi mu 2015, Aung San Suu Kyi yari amaze imyaka 15 afungishijwe ijisho kubera kurwanya ingoma y’igitugu y’abasirikare bari ku butegetsi. Yabonye igihembo cy’amahoro kitiriwe Nobel mu 1991.
Aung San Suu Kyi yavutse tariki ya 19 Kamena 1945 ,ni umunyapolitiki wo muri Birmaniya, umudipolomate, umwanditsi, akaba yarahawe igihembo cy’amahoro cyitiriwe Nobel mu 1991
yabaye umujyanama wa Leta ya Miyanimari na Minisitiri w’ububanyi n’amahanga kuva 2016 kugeza 2021
