Byagenda bite niba umukobwa ukunda atagukunda? Ese uzamujya kure numenya ko igihe cyose ugerageje kumwegera bimubangamira?
Biroroshye kubona ndetse no kumenya ko umukobwa ukunda, we atagukunda. Igihe cyose ugerageje kumwegera cyangwa kumuvugisha, biramubangamira. Gukomeza kumuhatiriza, sibyo bizagufasha gutsindira umutima we, ahubwo bituma arushaho kuguhunga. None, ni ubuhe buryo bwiza bwo kwirinda ko ibi bintu byakubaho? Ugomba kureka gutsimbarara, no kumwereka ko ushaka cyane ko umubano wanyu ukomeza. Kumuha umwanya nibyo bizafasha gukemura byose kandi mu buryo bwiza.
Ni ryari uzamenya ko umukobwa mukundana akeneye akanya ari wenyine, mbese ko iby’urukundo atakibirimo? Ibyiza nuko watangira kureba niba waratangiye kubona bimwe muri ibi bimenyetso tugiye kugarukaho muri iyi nkuru.
Arabangamirwa igihe cyose umwegereye
Ese iyo uteye intambwe umusanga, yitwara ate? Niba ahita amera nk’ubangamiwe, agatangira gusa naho ibintu byari byoroshye abikomeza, aho ugomba kwitonda kuko nicyo kimenyetso cya mbere. Ushobora nanone kubona asa nuwarambiwe ndetse agatangira no kuvuga nabi, nta seke cyangwa se niyo yabikora ukabona ko atari ibimuvuye ku mutima. Mugihe nyamara iyo umukobwa agukunda yitwara bitandukanye n’ibi tumaze kukubwira iyo murikumwe.
Azakujya kure
Niba igihe muri kuvugana asa nutabyitayeho ndetse akanajya kure yawe, hahandi iyo ugerageje kumwegera aguhunga, rwose ntagushidikanya iki ni ikindi kimenyetso. Kuko kuri we aba yumva binashobotse yahita azimira akava aho hantu ntiyongere kukubona hafi ye.
Ntaba ashaka kukureba iyo muri kuvugana
Biba bimeze bite mu gihe ugerageje kuvugana nawe? Aba aguhanze amaso? Cyangwa ntago aba ashaka guhuza amaso nawe? Bishobora kuba inzira nziza kuri we, yo kuguha ibimenyetso kugirango uahagarike ikiganiro. Mbese aba ashaka kukwereka ko adashishikajwe no kuganira nawe.
Aba ahugiye muri telephone
Ibi dushobora kubihuza nibyo twavuze haruguru. Umukobwa utakigukunda mbese wawundi ukeneye ko umuha umwanya, igihe murikumwe aho kwibanda kubyo uvuga ngo agutege amatwi, abe yanagusubiza bibaye ngombwa, akomeza kwirebera muri terefone ye, ndetse akajya ananyuzamo agaseka rwose akwereka ko hari abandi bari kuganira ibimushimishije kurusha ibyo wowe uri kumubwira.
Kugusubiza biramugora
Ni gute asubiza ibibazo runaka umubajije? Ese rimwe na rimwe agusubiza nk’aho atabishaka , hahandi avuga ijambo rimwe gusa cyangwa akaba yanavuga nabi? Niba agusubizanya agasuzuguro, ntagire ubushake bwo kuvugana ibintu umubajije nk’uko bigomba, bigaragaza ko atagishaka kuvugana nawe. Bibaye byiza wamuha umwanya ukareka gukomeza guhatiriza.
Asubiza yego cyangwa oya gusa
Umukobwa utakigukunda kandi ukeneye ko umuha umwanya, ikintu cyose umubajije uzasanga agusubiza yego cyangwa oya gusa. Ntago aba ashaka no gusobanura impamvu z’igisubizo cye. Niba rero nawe asigaye agusubiza gutya buri gihe, ibyiza nuko waba uhagaritse kugirana ibiganiro nawe. Kuko ibyo abikora ashaka ko ibiganiro byanyu bihagarara vuba.
Nta kintu aba aba ashaka kukubaza
Ikindi kintu kizakwereka ko umukobwa mukundana akeneye ko umuha umwanya, ni uko mu kuvugana kwanyu haba kuri terefone cyangwa murikumwe, uzisanga ari wowe gusa uvuga, we nta kintu na kimwe aba ashaka kukubaza cyangwa kukubwira. Muri make ni wowe gusa uba usa nk’aho wiganiriza.
Yigira nk’aho atakumvise
Haba hari ikintu kitagenda neza? Yego kirahari kandi ubibona cyane igihe atangiye kukwirengagiza. Uretse no kuba yigira nk’aho mutarikumwe, arakwirengagiza igihe cyose ugerageje kuganira nawe. Kugirango akwereke ko atakumvise, azahora ahugiye mu tuntu dutandukanye. Nubona bimeze bityo nawe ujye ubimenya ko akeneye umwanya.
Ahorana impamvu zituma ataguha umwanya
Umukobwa mwakundanaga ariko igihe kikagera bikamuvamo kugeza nubwo akwereka ko akeneye umwanya ari wenyine, igihe cyose uzamusaba umwanya ngo muhure muganire, azakubwira ko ahuze, afite ibintu byinshi byo gukora. Niyo wamuhamagara kuri terefone, ntakwitaba, n’iyo abikoze ahita ntabura ibyo akubwira yarahugiyemo kugirango gusa umuhe umwanya.
Ukimara kumenya ko umukobwa ukunda we, abangamirwa cyane no kuba murikumwe, ukwiye gushaka uburyo nawe ubyikuramo. Gukomeza usa nk’aho umwihambiraho cyangwa se umwereka cyane ko umukunda, bishobora gutuma akwanga ahubwo kurushaho. Nubwo bibabaza, uba ugomba kubaha uko yiyumva/ibyiyumviro bye n’amarangamutima ye ko atagukunda. Igihe kirageze ngo umuhe umwanya. Ninde wamenya? Ashobora no kuzagera aho akongera kukwiyumvamo amaze kubona ko wubaha kandi ugaha agaciro amarangamutima ye.
