Nyiricyubahiro Cardinal Kambanda yasoje uruzinduko rwa gitumwa yagiriraga mu gihugu cya Polonye muri Arkidiyosezi ya Gniezno akaba ari nayo Diyosezi nkuru muri iki gihugu kuko yashinzwe mu 1000 ubu ifite Imyaka 1022.
Nyuma yo kwitabira inama yahuje Papa n’Abakalidinali bose ba Kiliziya Gatolika i Roma, Arkiyepiskopi wa Kigali Antoni Karidinali KAMBANDA, yagiriye uruzinduko rwa gitumwa mu gihugu cya Polonye kuva tariki ya 6 kugeza tariki ya 10 Nzeri 2022.
Muri urwo ruzinduko, Antoni Karidinali KAMBANDA, yasuye Arkiyepiskopi wa Arkidiyosezi ya Poznań Stanisław Gądecki, akaba n’umukuru w’inama y’abepiskopi Gatolika mu gihugu cya Polonye.
Mu biganiro byabo bagarutse cyane ku buzima bwa Kiliziya muri iki gihe, ku bumwe n’ubwiyunge mu Rwanda nk’uko byatangajwe na Arkidiyosezi ya Kigali ibinyujije ku rukuta rwayo rwa Twitter.
Ibiganiro byabo byanagarutse ku bamisiyoneri bakomoka mu gihugu cya Polonye bari mu butumwa muri Afrika, inama iheruka yahuje Papa n’Abakaridinali, amateka ya Kiliziya muri Arkidiyosezi ya Poznan, umushinga wo kuba Katedrali nshya ya Kigali ndetse na kiliziya nshya ya Poznan Polanka.
Arkiyepiskopi wa Kigali yasuye kandi kiliziya ya Katedrali ya Gniezno, anabonana n’umuyobozi w’Iseminari nkuru ya Gniezno. Ikiganiro yagiranye n’umuyobozi w’iseminari cyagarutse ku ngingo zikurikira : umuhamagaro, isakramentu ry’ugushyingirwa, umuryango ndetse n’iyogezabutumwa muri rusange.
