Umugaba mukuru w’ingabo za Benin, Gen de Brigade Fructueux Candide Ahodegnon Gbaduidi uri mu ruzinduko rw’akazi mu Rwanda avuga ko umubano mwiza w’ibihugu byombi ukomeje gutuma n’imikoranire mu bya gisirikare ikomeza kwaguka.
Uyu mugaba w’ingabo za Benin yagiranye ibiganiro na mugenzi we w’u Rwanda, Gen Jean Bosco Kazura umugaba mukuru w’ingabo z’u Rwanda, kuri uyu wa Gatandatu tariki 23 Nyakanga.
Gen Gbaduidi avuga ko imikoranire ihamye hagati y’ingabo z’u Rwanda na Benin biri mu byibanze bimugenza.
Umugaba mukuru w’ingabo za Benin Gen de Brigade Fructueux Candide Ahodegnon Gbaduidi yasuye urwibutso rwa Jenoside rwa Kigali ruri ku Gisozi yunamira imibiri y’Abatutsi isaga ibihumbi 250 ihashyinguye.
Yanasobanuriwe amateka ya Jenoside yakorewe Abatutsi mu Rwanda aho yavuze ko ibyabaye bidakwiye kuzongera kuba ahariho hose.
Umugaba mukuru w’ingabo za Benin kandi yasuye ingoro y’urugamba rwo guhagarika Jenoside iri ku nteko ishinga amategeko ku Kimihurura.
Ni ku nshuro ya 2 Gen Gbaduidi asuye u Rwanda kuko yahaherukaga muri Werurwe uyu mwaka.
