Umwe mu bapadiri babiri ba Kiliziya Gatolika wari washimuswe n’abagabo bitwaje imbunda muri leta ya Kaduna mu majyaruguru ya Nigeria yishwe arashwe n’ababashimuse, nkuko Kiliziya ibivuga.
Pasiteri John Joseph Hayab ukuriye leta ya Kaduna ishami ry’ishyirahamwe ry’amadini ya gikristu muri Nigeria, yabwiye BBC dukesha iyi nkuru ko uwundi mupadiri we yarekuwe nyuma yuko hishyuwe ingurane.
Mu itangazo ryagiye ahagaragara, Kiliziya yavuze ko umurambo wa Padiri John Mark Cheitnum wabonetse ku wa kabiri.
Kiliziya kandi yongeyeho ko ubu ari ubwicanyi buteye ubwoba.
Yavuze ko uwo Mupadiri yarashwe ku wa gatanu w’icyumweru gishize ari na wo munsi yashimusweho.
Gusa Padiri Donatus Cleopas, warekuwe, we yongeye guhura n’umuryango we.
Aba bapadiri bashimuswe bafatiweho imbunda ubwo bari bari mu cyaro cya Yadin Garu muri leta ya Kaduna, aho bari bagiye kwitabira ibikorwa bya Kiliziya.
Ababashimuse bari basabye ingurane nyinshi, mu gihe polisi yo yari yavuze ko ibikorwa byo kubatabara byari birimo kuba.
Pasiteri Hayab yabwiye BBC ko ingurane yari yishyuwe nyuma y’ibiganiro n’ababashimuse, nubwo itangana n’iyo bari basabye mbere nuko ababashimuse bavuga aho umurambo wa Padiri Cheitnum ushobora kubonwa.
Kuva muri Gicurasi uyu mwaka, abihayimana barenga 10 bo mu madini ya gikirisitu biganjemo abo muri Kiliziya Gatolika, bamaze gushimutwa n’abagabo bitwaje imbunda mu bice bitandukanye byo muri Nigeria.
Abatari munsi ya batatu muri bo bishwe n’ababashimuse.
Abashimuswe akenshi barekurwa iyo hamaze kwishyurwa ingurane.
Ibi bibaye mu gihe Nigeria ihanganye n’inkubiri y’urugomo rwicirwamo abantu rukorwa n’ibico by’abagizi ba nabi bitwaje intwaro.
Kuva mu ntangiriro z’uyu mwaka kugeza ubu, abasivile babarirwa mu bihumbi barishwe cyangwa bashimutwa n’abasaba ingurane kugira ngo barekurwe. Ibi ahanini bibera mu majyaruguru y’igihugu.
Ubutegetsi bwa Perezida wa Nigeria Muhammadu Buhari burimo kurushaho kunengwa kubera kunanirwa gucyemura ikibazo cy’umutekano mucye ukomeje kugaragara henshi mu gihugu.
