Mu gitondo cyo kuri uyu wa kane tariki 26 Gicurasi 2022, yambaye Iroze. Impuzankano zisanzwe zambarwa n’abafunzwe, mu rukiko rwisumbuye rwa Nyarugenge, Ishimwe Dieudonné yagejejwe imbere y’ubucamanza , ngo aburane ku bujurire bw’ifungwa n’ifungurwa ry’agateganyo yari yajuririye we n’umwunganizi we.
Kuwa 11 Gicurasi nibwo,Ishimwe Dieudonné [Prince Kid] umuyobozi wa kompanyi yitwa Rwanda Inspiration Back Up yateguraga irushanwa ry’ubwiza rya Miss Rwanda,yaburanye ku ifungwa n’ifungurwa ry’agateganyo mu rukiko rw’ibanze rwa Kicukiro, urubanza rwaburaniwe mu muhezo. Kuwa 16 Gicurasi 2022 ni bwo urukiko rw’ibanze rwa Kicukiro rwemeje ko Ishimwe afungwa by’agateganyo, icyemezo yajuririye.
Kuri uyu munsi nabwo ubushinjacyaha bwasabye ko urubanza rw’ubujurire rubera mu muhezo kubera impamvu zumutekano w’abatangabuhamya n’abahohotewe, impamvu zari zanatanzwe mu rukiko rw’ibanze. Ibyo ni nyuma y’ubusabe bw’uregwa n’umwunganizi we Me. Nyembo Emelyne basabaga kuburanira mu ruhame urubanza rw’ubujurire ku ifungwa n’ifungurwa ry’agateganyo. Impamvu aba bombi batanze n’uko ngo ikirego cyagaragaye mu itangazamakuru abantu bose bakakimenya kandi umwanzuro w’urukiko rw’ibanze rwa Kicukiro ukaba warasomewe mu ruhame.
Umucamanza yavuze ko urukiko rwanzuye ko urubanza ruburanishwa mu muhezo kandi ko nta tegeko rivuga ko urubanza rw’ubujurire ruburanishirizwa mu ruhame kubera ko urw’ibanze rwasomewe mu ruhame.
