Ibi biremezwa n’abaganga batandukanye kimwe n’abajyanama b’ubuzima[abaremeshakiyago bo ku mitumba ] muri iki gihugu aho bavuga ko mu bagana amavuriro umubare munini wibasiwe na Malariya .
Abenshi muri bamwe mu barundi baganiriye n’ijwi ry’Amerika, bahuriza k’ugusaba Leta y’uburundi ko Yabaha inzitiramibu kuko baheruka kuzihabwa ku rwego rw’igihugu mu mwaka wa 2019 kuri ubu ngo n’abazihawe icyo gihe zarashaje ikaba ariyo mpamvu bibasiwe n’iyi ndwara.
Bamwe mu bajyanama b’ubuzima [Abaremeshakiyago] bo mu ntara za Mwaro na Bujumbura Rural ho muri komine Mutambu, bavuze ko inyigisho zihabwa abaturage ku kwirinda Malariya zikiri hasi bityo bigatiza umurindi iyi ndwara kandi ko hakiri byinshi byo gukora kugirango bahangane na yo.
“Inyigisho zihabwa abaturage zikwiye kwiyongera, Abaremeshakiyago( Abajyanama b’ubuzima ) n’abakuru b’imitumba (Abakuru b’imidugudu) bakagenzura ko n’inzitiramibu zikoreshwa neza kuko hari abo usanga barazifashe nabi.” Banavuze kandi ko :” Abenshi bazahazwa na Malariya kuko badafata indyo yuzuye.”
Kuba imibare y’abayirwaye iri hejuru cyane, binemezwa na bamwe mu baganga bo mu mavuriro y’ibanze bakorera mu ntara ya Kirundo na Bujumbura.
” Ni benshi cyane ugereranyije n’abantu baza kwivuza , abarenga 90 % mu bakuze dusanga barwaye Malariya, naho mu bana ho ni nk’aho ari bose ,ngirango ni nka 99% .”
Umukozi mu kigo cy’igihugu gishinzwe kurwanya Malariya yabwiye Ijwi ry’Amerika ko Leta ikora ibishoboka byose ngo ifashe abarwayi kandi inakangurire abaturage kwirinda.
Ati:”Turavura abantu bahuye n’iyo ndwara bagahabwa imiti ku buntu,abantu bahabwa inzitiramibu bakanakangurirwa kurara mu nzitiramibu iteye umuti. Habaho no kubegereza ubuvuzi ibizwi nka [Clinic Mobile ] , ndetse habaho no gutera imiti yica imibu mu mazu .”
Akomeza avuga ko “Habaho gukangurira abaturage kwirinda Malariya binyuze mu biganiro bibera mu midugudu, ku ma radio ,ku byapa n’ahandi” mu gihe abajyanama b’ubuzima bo bavuga ko hashize igihe kerenga umwaka izo nyigisho zidatangwa.
Mu mwaka ushize wa 2021, Umuryango mpuzamahanga wita ku buzima ku Isi watangaje ko Igihugu cy’u Burundu kiri mu bihugu 36 by’Afurika bitageze ku ntego yo kugabanya Malariya kugera ku bice 40%.
Malariya ifatwa nk’icyorezo mu Burundi kuko ari yo iza ku isonga irembeje benshi cyane cyane abagore n’abana nk’uko byatangajwe na Minisiteri y’ubuzima y’iki gihugu ku munsi mpuzamahanga wo kurwanya Malariya.
