Umuhanzikazi w’icyamamare, umunya-colombia Shakira agiye kujyanwa imbere y’ubutabera bwa Espagne ashinjwa gukwepa kwishyura imisoro ikabakaba miliyoni 14.5 z’ama euro.
Umuhanzikazi w’icyamamare, Isabel Mebarak Ripoll wamenyekanye cyane nka ‘Shakira’ agiye kujyanwa imbere y’ubutabera bwa Espagne ashinjwa gukwepa kwishyura imisoro ikabakaba miliyoni 14.5 z’ama euro.
Urukiko rwo muri Barcelone rwategetse ko uyu muririmbyi akurikiranwa ku byaha bitandatu ashinjwa, n’ubwo nta tariki yamenyeshejwe.
Abashinjacyaha ba Espagne bashaka ko Shakira w’imyaka 45 y’amavuko, afungwa imyaka umunani, agatanga n’ihazabu ingana na miliyoni 23,8 z’ama euro mu gihe yahamwa n’icyaha. Gusa we ahakana ibyaha aregwa.
Mu kiganiro aheruka kugirana n’ikinyamakuru Elle cyo muri Espagne, Shakira yagize ati: “Ndizera ko mfite ibyemezo bihagije kugira ngo niregure kandi ko ubutabera bangira umwere.”
Mu itangazo ryabo, abunganira Shakira mu mategeko, bavuga ko bazakora icyo bashinzwe “mu kwerekana ukuri mu gihe nyacyo.”
Uru rubanza kandi rushingiye ku kirego kijyanye n’aho yabaye hagati ya 2012 na 2014, igihe abashinjacyaha bamushinjaga ko aba muri Espagne ariko akaba yandikishije ko yabaga ahandi.
Mu mategeko ya Espagne, abantu babaye mu gihugu amezi arenga atandatu bafatwa ko bagomba kwishyura imisoro. Ariko Shakira avuga ko icyo gihe atabaga muri Espagne.
Muri Nyakanga, abashinjacyaha bashyize ahagaragara inyandiko ivuga ko yari yaguze inzu muri Barcelone mu 2012, ikaza kuba iyo kubamo we n’umukunzi we icyo gihe, umukinnyi w’umupira w’amaguru wa Barcelone, Gerard Piqué.
