Nyuma y’igihe yakira ibirego bitandukanye by’ubujura bwa moto cyane cyane mu mujyi wa Kigali, RIB ku bufatanye na Polisi y’Igihugu yafashe itsinda ry’abantu 11 bakekwaho ubwo bujura ndetse no kurema umutwe w’abagizi ba nabi.
Aba bafashwe ngo bazibaga (moto) mu Mujyi wa Kigali bakajya kuzigurisha mu tundi turere harimo Gicumbi na Gatsibo, nk’uko byatangajwe n’Urwego rw’Igihugu rw’Ubugenzacyaha (RIB).
RIB ikomeza igira iti :”Basangaga moto aho ziparitse bagacomora insinga bakatsa moteri bakazitwara cyangwa bagacurisha imfunguzo bakajya aho ziparitse cyane cyane hafi ya resitora mu gihe abamotari bafata ifunguro bakazitwara.”
RIB kandi, irashimira abatanze amakuru kugirango aba bafatwe, inibutsa abaturarwanda kugira amakenga n’ubushishozi mu gihe bagura ibikoresho bitandukanye kuko gutunga ibyibano bikurikiranwa n’amategeko.
