Umukuru w’igihugu cya Kenya, Uhuru Kenyatta yatumije inama y’abakuru b’ibihugu bigize Umuryango wa Afrika y’Iburasirazuba (EAC) kuri uyu wa Mbere kugirango baganire ku kibazo cy’amahoro n’umutekano muri Repubulika Iharanira Demokarasi ya Congo (DRC), nk’uko biri mw’itangazo rya Leta.
Kenyatta, ari nawe ayoboye EAC ku wa Gatanu yasabye ko hakoherezwa umutwe w’ingabo za EAC guhagarika imvururu zirangwa mu burasirazuba bw’iki gihugu giherutse kwinjira muri uyu muryango.
Hagati aho, DRC ntishaka kwumva ko Urwanda ruri mu bagize izi ngabo, ikaba mbere yarahagaritse imigenderanire n’u Rwanda.
Iki gihugu gishinja u Rwanda ko rufasha umutwe w’inyeshyamba M23 ziherutse kwigarurira umujyi wa Bunagana.
Mu itangazo yasohoye, Pereziza Antoine Felix Tshisekedi ashinja u Rwanda ko rushaka kwigarurira igihugu cye kugira ngo rubashe gucukura amabuye y’agaciro ari muri iki gihugu, mbere akaba yarasabye u Bwongereza gushyira igitsure ku Rwanda kugira ngo ibyo bikorwa bihagarare.
Mu byumweru bike bishize, umubano hagati y’ibi bihugu watangiye kugenda uzamo kidobya, Abanye-Congo bakora imyigaragambyo myinshi yamagana u Rwanda. Umusirikare wa DRC kandi aherutse kurasa ku bashinzwe kurinda umupaka uhuza ibi bihugu bituranyi i Bukavu, akomeretsa abapolisi babiri, nawe yahasize ubuzima Kuko mu rwego rwo kwirwanaho yahise araswa n’abapolise b’u Rwanda.
Kenya niyo ihagarariye, ikaba n’umuhuza mu biganiro hagati ya Leta ya DRC n’imitwe y’inyeshyamba itandukanye.
Hagati aho, ibi biganiro ntacyo birageraho.
