Papa Francis yavuze ko yakutse umutima kubera ubwicanyi bwabereye ahitwa Robb Elementary i Uvalde, muri Texas, kandi ko Amerika igomba kugira uruhare mu gukumira ikwirakwizwa ry’imbunda.
Muri icyi cyumweru, abanyeshuri 19 n’abantu bakuru babiri barapfuye barashwe n’umusore w’imyaka 18 witwaje imbunda wabaga muri Uvalde. Ibyatumye ejo ku wa gatatu, Umushumba wa Kiliziya Gatolika ku Isi Papa Francis, avuga ko yababajwe bikomeye n’ubu bwicanyi.
Yagize ati: “Ndasengera abana ndetse n’abantu bakuru bishwe, ndetse n’imiryango ya bo. Igihe kirageze cyo kuvuga bihagije ku gucuruza intwaro mu buryo bw’akajagari.” Yavuze ko abantu bagomba kugira icyo bakora ubu, kugira ngo ibyago nk’ibi bitazongera ukundi.
Imyumvire ye ayihuriye ho n’undi muyobozi mukuru wa Kiliziya gatolika muri Amerika: Cardinal Blase J. Cupich, musenyeri mukuru wa Chicago.
Abinyujije ku rubuga rwa Twitter, Cupich yagize ati: “Ivugurura rya kabiri ntabwo ryavuye kuri Sinai.” “Uburenganzira bwo gutunga intwaro ntibuzigera bugira agaciro kuruta ubuzima bwa muntu. Abana bacu nabo bafite uburenganzira. Kandi abayobozi bacu batowe bafite inshingano zo kubarinda.”
Karidinali yakomeje avuga ko nk’igihugu hakwiye kugira igikowa ngo tharindwe abenegihugu.
Ati”Iyo ntekereje kuri ubu bwicanyi buherutse kuba muri Amerika, nkomeza kugaruka ku bibazo: Turi bande nk’igihugu niba tutagize icyo dukora ngo turinde abana bacu? Ni iki dukunda cyane: ibikoresho by’urupfu cyangwa ejo hazaza hacu?”
Guverineri wa Texas Greg Abbott avuga ko uyu musore yapfuye nyuma yo kurasana n’abapolisi kuri iryo shuri. Abapolisi babiri barakomeretse ariko Abbott avuga ko batababaye cyane.
Abarashwe ni abanyeshure biga mu wa 2, 3 na 4 bari hagati y’imyaka 7 na 10. Abarimu babiri kandi barishwe barashwe n’uyu musore kuri iryo shuri ry’abana ryigamo abagera kuri 500, hafi bose bakaba bafite inkomoko muri Amerika y’Epfo.
