Kuri uyu wa 9 Kamena 2022, Urukiko Rwisumbuye rwa Musanze rwasubitse ku nshuro ya kabiri urubanza ruregwamo umuganga witwa Maniriho Jean de Dieu, ukekwaho ibyaha byo gusambanya umwana, gukuriramo inda undi n’ubwicanyi bugambiriwe, yakoreye Iradukunda Emelance w’imyaka 17, kuko umuganga wakoze isuzuma ku murambo we atitabye Urukiko.
Ni umwanzuro wafashwe n’Urukiko Rwisumbuye nyuma y’uko rwari rwatumije umuganga w’inzobere witwa Dr Rwahama Samson, wakoze isuzuma ku murambo wa nyakwigendera kugira ngo agire ibyo asobanurira urukiko kuri raporo yakoze, gusa ntiyabasha kwitaba ndetse ntiyagaragaza n’impamvu yatumye atitaba Urukiko.
Uru rubanza rwitabiriwe n’abo mu muryango wa Iradukunda, Umushinjacyaha, Ariko abunganira Maniriho uregwa bo ntibabashije kuboneka ku mpamvu batanze bavuga ko bari bafite izindi manza bagombaga kuburanisha mu zindi nkiko.
Ni ku nshuro ya kabiri uru rubanza rwahamagajwemo uyu muganga wakoze isuzuma ku murambo wa Iradukunda rusubitswe, aho rwari kuburanishwa ku wa 31 Gicurasi 2022 saa yine za mu gitondo, ntirwaba kubera ko abacamanza b’Urukiko batari mu kazi ahubwo bari mu mahugurwa. Rwimuriwe kuri uyu wa 9 Kamena 2022 nabwo ntirwaburanishwa.
Urukiko rumaze kugaragaza inzitizi muri uru rubanza, babajije uregwa Maniriho wari kuburanishwa ku ikoranabuhanga ari muri Gereza ya Musanze asubiza ko ataburana atari kumwe n’abamwunganira mu mategeko.
Urukiko kandi rwabajije Ubushinjacyaha icyo bwavuga kuri izi nzitizi, nabwo busubiza ko kuba abunganira uregwa batabonetse kandi bagatanga impamvu zumvikana, bifite ishingiro, bwongeraho ko ubutabera bugomba gutangwa nabwo buzashingira ku bisobanuro muganga Rwahama Samson azatanga kuri raporo yakoze ku murambo wa Iradukunda, bityo ko urubanza rutaburanishwa adahari bemeza ko rwasubikwa rugahabwa indi tariki.
Mu iburanisha ryabaye ku wa 8 Werurwe 2022, ku cyaha cy’ubwicanyi bugambiriwe, Ubushinjacyaha bwagaragaje ko hari ibimenyetso bishinja Maniriho ngo kuko akimara gufatwa ababishinzwe bagiye gusaka iwe bahasanga umugozi usa neza n’uwari uziritse ku maguru, amaboko no mu ijosi ry’umurambo wa Iradukunda ubwo watoragurwaga mu murima w’ibishyimbo by’umuturage ku wa 2 Ugushyingo 2020.
Muri uko gusaka Maniriho, ngo iwe habonetse umukeka uriho amaraso atabashije gusobanura iby’inkomoko yayo ubwo yabazwaga n’Ubugenzacyaha, ndetse ngo habonetse inyundo bikekwa ko na yo yayifashishije mu kwica Iradukunda.
Ubushinjacyaha kandi bwagaragaje ko iperereza n’ipimwa byakorewe muri Rwanda Forensic Laboratory byagaragaje ko amaraso yagaragaye ku mukeka amwe afitanye isano n’aya Iradukunda andi afitanye isano n’aya Maniriho.
Uru rubanza rwaranzwe no gusubikwa inshuro nyinshi kuko rwatangiye kuburanishwa mu ifungwa n’ifungurwa by’agateganyo ku wa 21 Mutarama 2021 mu Rukiko rw’Ibanze rwa Muhoza nyuma yo gusubikwa ishuro enye bitewe n’uko hubahirizwaga ingamba zo kwirinda Covid-19.
Maniriho yatawe muri yombi ku wa 5 Ugushyingo 2020.
Urukiko rwategetse ko uru rubanza rwimurirwa ku wa 28 Kamena 2022 saa tatu za mugitondo.
