Boris Johnson uyu munsi aregura ku mwanya w’umukuru w’ishyaka riri ku butegetsi mu Bwongereza ry’abadashyigikira impinduka, Conservative, nyuma y’igitutu gikomeye cy’abagize Guverinoma ye bakomeje kwegura.
Biteganijwe ko Johnson aza gutangaza kwegura kwe kuri uyu wa kane tariki 7 Nyakanga, 2022, ariko azakomeza kuba Minisitiri w’Intebe w’Agateganyo kugeza mu Kwakira w’uyu mwaka, ubwo iri shyaka rizakorera amatora rikemeza umuyobozi waryo mushya.
Umuvugizi w’ibiro bya Minisitiri w’intebe bizwi nka No 10 Downing Street yagize ati: “Minisitiri w’intebe araza kugeza itangazo ku gihugu uyu munsi”.
Guhatanira umwanya wo kumusimbura ku buyobozi bw’ishyaka bizaba muri iyi mpeshyi, naho Minisitiri w’intebe mushya azaba ariho mu kwezi kwa cumi uyu mwaka ubwo hazaba haba inama nkuru y’ishyaka.
Kuva mu mwaka wa 2019 kugeza muri uyu wa 2022, Boris Johnson abaye umwe muri ba Minisitiri w’intebe b’Ubwongereza bamaze igihe kigufi ku buyobozi.
Umwe mu bantu ba hafi ba Johnson yatangaje ko mu masaha 48 ashize, yari afite gahunda yo gukomeza guhatana ku buryo adatega amatwi amajwi amusaba kwegura. Gusa aho bigeze ngo ni uko ari bwegure.
