Hon. Bamporiki Edouard wari Umunyamabanga wa Leta muri Minisiteri y’Urubyiruko n’Umuco yahagaritswe ku mirimo ye kubera ibyo akurikiranyweho bitatangajwe.
Itangazo riturutse mu biro bya Minisitiri w’Intebe, ryo kuri uyu wa Kane tariki 5 Gicurasi 2022, rihagarika uyu muyobozi ku nshingano ze, rivuga ko yahagaritswe kubera ibyo agomba kubazwa akurikiranyweho.
Urwego rw’Igihugu rw’Ubugenzacyaha (RIB) rubinyujije ku rukuta rwa Twitter rwashyizeho ubutumwa bugira buti “Bamporiki Edouard wari Umunyamabanga wa Leta muri Minisiteri y’Urubyiruko n’Umuco akurikiranweho icyaha cya ruswa n’ibyaha bifitanye isano nayo. Iperereza ku byaha akurikiranyweho rikaba rikomeje mu gihe afungiwe iwe mu rugo.”
Tariki 04 Ugushyingo 2019, nibwo Hon. Bamporiki Edouard yagizwe Umunyamabanga wa Leta muri Minisiteri y’Urubyiruko n’Umuco, avuye ku mwanya w’Umuyobozi Mukuru w’Itorero ry’Igihugu, inshingano yari yagiyeho muri 2017.
