Leta ya Angola n’umugore wa Nyakwigendera Eduardo dos Santos, bashatse Abanyamategeko babahagararira kubera amakimbirane ari mu muryango kubijyanye n’ishyingurwa ry’uwahoze ari Perezida w’iki gihugu.
Abana bakuru b’uwahoze ari Perezida wa Angola dos Santos, barashaka ko umurambo we uguma muri Espagne akaba ariho ushyingurwa, mu gihe abana bato n’umugore we Ana Paula dos Santo, bashaka ko ugarurwa muri Angola.
Eduardo dos Santos yitabye Imana tariki 8 Nyakanga, 2022 aguye mu bitaro by’i Barcelone muri Espagne. Yavuye ku butegetsi muri 2017 nyuma yo kuyobora Angola mu gihe cy’imyaka 38.
Ibinyamakuru byo muri Angola bivuga ko ibiganiro byabaye hagati y’umuryango wa dos Santos na Leta ku bijyanye n’ishyungurwa rye, ntacyo byagezeho.
Biteganijwe ko urukiko rwo muri Espagne ruzafata umwanzuro niba umurambo wa dos Santos waguma muri icyo gihugu, mu mpera z’uku kwezi.
