Nyirangiruwonsanga Solange ukekwaho kwica umwana w’aho yakoraga akazi ko mu rugo mu Murenge wa Ndera ho mu Karere ka Gasabo, yahakanye icyaha akurikiranyweho.
Yabihakanye ubwo yaburanishwaga mu ruhame aho yakoreye icyaha, kuri uyu wa Gatanu tariki 15 Nyakanga 2022, aho yaburanishwaga n’urukiko rwisumbuye rwa Gasabo ku cyaha akekwaho cyo kwica Rudasingwa Ihirwe Davis w’imyaka ikenda(9) y’amavuko wishwe kuwa 12 Kamena 2022, bakamusanga aziritse mu mugozi ku byuma by’amadirishya aho yari yasigaranye n’uyu mukozi wo mu rugo.
Urwego rw’Igihugu rw’Ubugenzacyaha [RIB], rwari rwatangaje ko iperereza ry’ibanze ryakozwe, ryagaragaje ko uregwa yemeye ko ari we wishe nyakwigendera ndetse ko na we ubwe yabyiyemereye.
Kuri uyu wa Gatanu ubwo Nyirangiruwonsanga yagezwaga imbere y’ubutabera, Ubushinjacyaha bwavuze ko yishe nyakwigendera abanje kumushuka ngo aze bicunge, ubundi akamuhambiriza umugozi mu ijosi ku byuma biri mu idirishya (grillage) amuhagaritse ku ntebe, ubundi agahita akuraho iyi ntebe, ibyamuviriyemo kubura ubuzima.
Umushinjacyaha yavuze ko uregwa yahise yitanguranwa agahamagara umubyeyi wa nyakwigendera amubwira ko umwana we yiyahuye.
Ubushinjacyaha bwakomeje busaba urukiko kumuhamya icyaha, ndetse bumusabira guhanishwa igifungo cya burundu.
Uregwa yahawe umwanya ngo yisobanure, maze arabihakana avuga ko kuba yaremereye Ubugenzacyaha ko ari we koko wishe nyakwigendera, yabyemejwe n’inkoni yakubiswe ubwo yabazwaga. Akomeza gutsindagira ko Rudasingwa Ihirwe Davis ariwe wiyahuye.
Nyirangiruwonsanga yakomeje avuga ko ahubwo Urukiko rukwiye kumurenganura, akavuga ko uriya mwana ashobora kuba yarimanitse mu mugozi kubera film z’abantu biyahura yakundaga kureba.
Naho ku gihano cyo gufungwa burundu yasabiwe n’Ubushinjacyaha, yavuze ko atari umunyamategeko ariko ko mu gihe Urukiko rwasanga ahamwa n’iki cyaha, rwazemeza iki gihano.
Urukiko rwanzuye ko icyemezo cyarwo kizasomwa tariki 25 Nyakanga 2022.
