Umutwe wa w’inyeshyamba M23 uremeza ko ubu wamaze gufata umujyi wose wa Bunagana, umujyi uturukamo ibicuruzwa biva Uganda byerekeza i Goma ndetse uyu niwo wa mbere ugaburira abatuye i Goma. Uri ku mupaka uhuza Repubulika Iharanira Demokarasi ya Congo na Uganda.
Radio Okapi yavuze ko amakuru aturuka i Bunagana avuga ko ingabo za DRC (FARDC) zavuye mu birindiro byazo muri iki gitondo nta mirwano, umujyi uhana imbibi na Uganda. Bongeraho ko FARDC yambutse muri Uganda n’intwaro zabo zose. Ariko FARDC ntabwo iremeza uku guhunga.
Aya makuru kandi yemejwe na Willy Ngoma umuvugizi w’uyu mutwe, yabwiye BBC Gahuzamiryango ati: “Yose [Bunagana] nta kuvanaho na hamwe, twayifashe”.
Ku ruhande rwa Leta ya DR Congo ntacyo iratangaza ku bivugwa na M23 ko yafashe Bunagana.
Nyuma yo gushinja u Rwanda gushyigikira M23, ubu Leta ya Congo iri gushinja Uganda na yo gufasha M23 nk’uko biri mu itangazo ryashyizweho umukono na Général de Brigade Sylvain Ekenge, umuvugizi wa Guverineri w’intara ya Kivu ya Ruguru.
Iri tangazo rivuga ko Ingabo za FARDC zihagazeho mu mirwano yo kuri iki cyumweru zibuza M23 ifashwa n’ u Rwanda kwigarurira Bunagana, kuko ngo uyu mutwe washakaga gufata uyu mujyi hanyuma ugafungira amazi n’umuriro umujyi wa Goma, ukabona ijambo rikomeye ryo gushyira igitutu kuri Leta ya Congo.
Itangazo ry’ingabo za Leta ya DR Congo kuri ubu ishinja u Rwanda gutera inkunga M23, ryo ku cyumweru, rivugako ingabo za Leta zasubije inyuma “ibitero bya M23 ifashijwe n’u Rwanda byari bigamije gufata umujyi wa Bunagana”.
Bunagana yaherukaga gufatwa na M23 mu 2012 aho yawifashishije mu kugaba ibitero byafashe umujyi wa Goma, M23 yambuwe Bunagana mu Ukwakira(10) 2013.
