Uwahoze ari Perezida wa Leta Zunze Ubumwe za Amerika, Donald Trump yavuze ko abapolsi b’ikigo gishinzwe Iperereza FBI binjiye mu nyubako ye y’ahitwa Mar-a-Lago, mu mujyi wa Palm Beach, muri leta ya Florida.
Ibitangazamakuru bivuga ko icyatumye FBI ijya kuhasaka kitaramenyekana.
Ariko ubutabera bumaze igihe bukora iperereza ku madosiye y’impapuro amwe n’amwe arimo amakuru y’ibyabereye mu ngoro ya White House igihe Trump yari perezida.
Ayo madosiye Trump ashinjwa kuba yarayimukanye muri Florida igihe yavaga muri White House muri Mutarama 2021. FBI yirinze kuvuga niba Munisitri w’Ubutabera ari we wabohereje gusaka iyo nyubako.
Mu ntangiriro z’uyu mwaka, ikigo cya leta gishinzwe kubika amabanga y’ibyanditswe cyavuze ko cyasanze amasandugu 15 yuzuye amadosiye y’amabanga muri iyo nyubakwa ya Trump y’i Mar-a-Lago aho aba.
Amerika ifite itegeko ryatowe mu 1978 rivuga ko amabanga yose ya perezida igihe aba ari ku butegetsi ari ay’igihugu kandi ko agomba gushyirwa aho agenewe kubikwa kuva igihe perezida avuye ku butegetsi.
Iri saka rije mu gihe Trump ari mu myiteguro yo kuzongera kwiyamamaza ku mwanya wa Perezida mu 2024.
