Kuri uyu wa gatanu tariki ya 6 Gicurasi 2022, Abanyalibani baba mu mahanga batangiye gutora ababahagarariye mu matora y’abadepite, ni amatora yabaye ariko mu gihe ibitangazamakuru bya leta byavuze ko muri iyi myaka ibiri hari ikibazo cy’ubukungu kitigeze kibaho cyibasiye abatari bake muri iki gihugu.
Ni ku nshuro ya kabiri mu mateka y’igihugu, abenegihugu baba mu mahanga bashoboye kwitorera ababahagarariye 128, mu matora ateganijwe kubera iwabo ku ya 15 Gicurasi.
None ku wa gatanu, ku isaha ya saa moya za mu gitondo aya matora yabaye mu mahanga mu bihugu icyenda by’Abarabu no muri Irani, mu gihe abasigaye bazatora mu bindi bihugu 48 ku cyumweru.
Ejo ku wa kane, Minisitiri w’ububanyi n’amahanga , Abdallah Bou Habib, yatangaje ko Abanyalibani bakorera mu mahanga bashobora gutora mu biro by’itora birenga 205.
Abantu barenga 225.000 biyandikishije gutora bari mu mahanga, imibare igaragaza ko biyongereye cyane bakava ku 92.000 bari biyandikishije mu matora yo muri 2018, nubwo icyo gihe 50.000 gusa ari bo batoye. uku kwiyandikisha , nubwo bigenda byiyongera, ugereranyije ni bike muri miliyoni z’abanyalibani baba mu mahanga, n’ababakomokaho.
Ikibazo cy’ubukungu cyatumye Abanyalibani bo mu cyiciro gifite amikoro make, barimo imiryango, abakirangiza amashuri, abaganga n’abaforomo bimuka bashaka ejo hazaza heza.
Mu gihe imitwe itavuga rumwe n’ubutegetsi yizera ko Abanyalibani baba mu mahanga bazatora impinduka, 6% gusa batoye abigenga mu mwaka wa 2018 ,nk’uko raporo iheruka gukorwa n’ikigo cy’Abarabu gishinzwe ivugurura ry’Abarabu kibitangaza.
