Mu mukino witabiriwe na Perezida Paul Kagame na mugenzi we Bassirou Diomaye Faye uheruka gutorerwa kuyobora Sénégal. Ikipe y’Ingabo APR BBC yakinnye uyu mukino idafite ba kizigenza bayo babiri Noel Obadiah na Adonis Filer bavunikiye mu mukino wo ku wa Gatandatu wa Rivers Hoopers.
Amakipe yombi yatangiye atsindana abifashijwemo na Axel Mpoyo na Mike Fofana. Agace ka mbere karangiye AS Douanes iyoboye umukino n’amanota 23 kuri 18 ya APR BBC.
Iyi kipe yo muri Sénégal yakomeje gukina neza cyane no mu gace ka kabiri, abarimo Fofana na Maduk Akec bakomeza kwigaragaza. Ku rundi ruhande Mpoyo yagerageza gutsinda ariko akabura uwo bafatanya.
Igice cya Mbere cyarangiye AS Douanes iyoboye umukino n’amanota 44 kuri 28 ya APR BBC. Mu gace ka kabiri, Ikipe y’Ingabo yatsinze amanota 10 gusa mu gihe indi yatsinze 21. Mu gace ka gatatu, Ikipe y’Ingabo yakomeje gukina nabi n’icyizere wabonaga ari gike kongeraho amakosa menshi no gutakaza imipira cyane. Aka gace karangiye AS Douanes ikomeje kuyobora umukino n’amanota 63 kuri 46 ya APR BBC.
Iyi kipe yo muri Sénégal yakomeje gukina neza no mu gace ka nyuma Harouna Amadou akorera mu ngata Fofana barushaho gutsinda. Ni mu gihe APR BBC yari yamaze kwiyakira yashyize mu kibuga abatarabonye umwanya uhagije wo gukina nka Niyibizi Shema Larson, Chris Ruta na Mohamed Camara.
Umukino warangiye AS Douanes yatsinze APR BBC amanota 79-54, iyisezerera muri BAL 2024.Muri rusange Sahara Conference yarangiye iyobowe na Rivers Hoopers, ikurikiwe na AS Douanes, US Monastir na APR BBC ya nyuma yatsinze imikino ibiri gusa muri itandatu yakinnye.
