Mu Budage, umwana w’umuhungu wari umaze icyumweru aburiwe irengero, yasanzwe muri ruhurura itwara imyanda y’abantu ari muzima.
Uyu mwana w’imyaka umunani(8) y’amavuko, yamenyekanye kw’izina rimwe gusa rya Joe, yabuze mu muryango we uri mu karere ka Oldenburg ku wa 17 z’uku kwa gatandatu, ibyatumye Polisi itangira ibikorwa byo kumushakisha.
Yatowe kuri uyu wa Gatandatu tariki 25 Kamena, ubwo umuntu yarimo yitambukira yumva ijwi ry’umuntu mu kinogo cy’imyanda (regard) gipfundikiye. Polisi ivuga ko nta muntu ishinja iki cyaha, ahubwo ko uwo mwana w’umuhungu yinjiye muri icyo kinogo gitwara imyanda ku musi yaburiyeho.
Nyuma y’aho abashinzwe kuzimya inkongi z’umuriro bavaniye uyu mwana muri iyo ruhurura ifite metero hafi 300 uvuye iwabo w’uyu mwana, yahise ajyanwa kwa muganga kugira ngo bamupime nimba ataba yaranduye indwara ziturutse ku bukonje, ariko nta bikomere bikomeye yari afite.
Polisi ibinyujije kuri Twitter, niyo yahise itangaza aya makuru, iti: “Joe w’imyaka umunani aracyari muzima!”
Polisi yakoze igikorwa cyo gushakisha uyu mwana nyuma y’aho iherewe amakuru n’a baturage, nk’uko umukuru wa yo Johann Kühme yabitangaje.
Yagize ati: “Ku makuru twahawe n’abaturage, twashoboye kubona Joe ari mu kinogo cy’imyanda.”
Akomeza agira ati “Ikintu nyamukuru ni uko akiri muzima kandi yahise ajyanwa ku bitaro aho arimo gukurikiranwa neza. Ubu twese twakwishima”.
Se w’uyu mwana yabwiye ibinyamakuru byo muri ako karere ko Joe “yari ameze neza” arebye ibyo yaciyemwo.
Hari abibaza ukuntu uyu mwana w’umuhungu yinjiye muri iyo ruhurura, ariko ejo ku wa kabiri Polisi yavuze ko bimugoye yashoboye kwinjiramwo hanyuma akaza “kubura ibyo yifashisha ngo avemwo.”
