Ku wa kabiri w’icyi cyumweru Ikipe y’igihugu y’umupira w’amaguru (Amavubi Star) yatanyiye umwiherero mu karere ka Bugesera watangiranye n’abakinnyi bakina imbere mu gihugu biyongereyeho na Djihad Bizimana usanzwe akina hagati mu ikipe ya KMSK Deinz mu cyiciro cya kabiri mu Bubiligi ariko akaba amaze iminsi mu Rwanda kuko shampiyona yarangiye.
Mu gitondo cyo kuri uyu wa Gatanu ba myugariro Manzi Thierry na Emmanuel Imanishimwe bakina muri FAR Rabat yo muri Maroc, na Nirisarike Salomon ukina muri FC Urartu yo muri Armenia, bageze mu mwiherero w’Amavubi wo kwitegura imikino yo gushaka itike ya CAN ya 2023 izabera muri Côte d’Ivoire.
Aba bakinnyi baje biyongera kuri Mutsinzi Ange Jimmy ukinira CD Trofense mu cyiciro cya kabiri muri Portugal wahageze ku munsi w’ejo, ndetse n’abandi bakinnyi 21 basanzwe bakina mu Rwanda batangiye umwiherero ku wa Kabiri w’iki cyumweru.
Abandi bakinnyi basigaye bataragera mu Rwanda barimo Rutahizamu Meddie Kagere ukinira Simba SC muri Tanzania azagera mu Rwanda ku Cyumweru tariki 29 Gicurasi 2022 saa moya z’umugoroba, mu gihe Raphael York ukina mu ikipe ya AFC Eskilstuna muri Suède biteganyijwe ko azasanga abandi muri Afurika y’Epo kuwa 30 Gicurasi 2022.
Ikipe y’igihugu Amavubi, izahaguruka i Kigali kuwa 30 Gicurasi 2022 yerekeza muri Afurika y’Epfo aho biteganyijwe ko izakina na Mozambique kuwa 2 Kamena 2022.
Umukino w’u Rwanda na Mozambique uzakinirwa kuri FNB Stadium Saa kumi z’umugoroba. Biteganyijwe ko bazahita bagaruka tariki 3 Kamena 2022. Mu gihe Umukino u Rwanda na Sénégal uzakinwa tariki ya 7 Kamena 2022 kuri Stade mpuzamahanga ya Huye Saa tatu z’ijoro.
Urutonde rw’abakinnyi bahamagawe:
Abanyezamu: Kwizera Olivier, Kimenyi Yves na Ntwari Fiacre.
Abakina inyuma: Imanishimwe Emmanuel, Nirisarike Salomon, Niyomugabo Claude, Nsabimana Aimable, Mutsinzi Ange, Buregeya Prince, Ombolenga Fitina, Manzi Thierry, Serumogo Ally Omar, Ndayishimiye Thierry, Niyigena Clement na Ishimwe Christian.
Abakina hagati: Nishimwe Blaise, Manishimwe Djabel, Mugisha Bonheur, Bizimana Djjhad, Muhire Kevin, Raphael York na Ruboneka Bosco.
Abataha izamu: Danny Usengimana, Meddie Kagere, Byiringiro Lague, Mugunga Yves, Hakizimana Muhadjili na Ndayishimiye Antoine Dominique.
